കോട്ടയം: കത്തോലിക്കാ സഭയിലെ വിവിധ സന്യാസിനി സമൂഹങ്ങളില്‍ നിന്നുള്ള ഡോക്ടര്‍മാരുടെ ദേശീയസംഘടനയായ സിസ്റ്റര്‍  ഡോക്‌ടേഴ്‌സ് ഫോറം ഓഫ് ഇന്ത്യയുടെ ആഭിമുഖ്യത്തില്‍ സംസ്ഥാന തല ഡോക്‌ടേഴ്‌സ് സംഗമം സംഘടിപ്പിച്ചു. തെള്ളകം ചൈതന്യ പാസ്റ്ററല്‍ സെന്ററില്‍ രണ്ട് ദിവസങ്ങളിലായി സംഘടിപ്പിച്ച സംഗമത്തില്‍ ആയുര്‍വ്വേദം, അലോപ്പതി, ഹോമിയോ തുടങ്ങി വിവിധ മേഖലകളില്‍ ഡോക്ടര്‍മാരായി സേവനം ചെയ്യുന്ന 55 ഡോക്ടര്‍മാരായ സന്യാസിനികള്‍ പങ്കെടുത്തു. കോട്ടയം അതിരൂപതാ വികാരി ജനറാള്‍ ഫാ. മൈക്കിള്‍ വെട്ടിക്കാട്ട് സംഗമം ഉദ്ഘാടനം ചെയ്തു. സിസ്റ്റര്‍ ഡോ. ഗീതി എസ്.ഡി ചടങ്ങില്‍ അദ്ധ്യക്ഷത വഹിച്ചു. പാലാ ഐ.എം.എ പ്രസിഡന്റ് ഡോ. അലക്‌സ് ബേബി, ഡോ. സിസ്റ്റര്‍ ബെറ്റി ജോസ്, സിസ്റ്റര്‍ അല്‍ഫോന്‍സ് എസ്.എച്ച്, സിസ്റ്റര്‍ എല്‍സി എസ്. എച്ച് തുടങ്ങിയവര്‍ പ്രസംഗിച്ചു. സംഗമത്തോടനുബന്ധിച്ച് കൗമാരക്കാരിലെയും യുവജനങ്ങളിലെയും മാനസിക പ്രശ്‌നങ്ങളും പരിഹാരമാര്‍ഗ്ഗങ്ങളുമെന്ന വിഷയത്തില്‍ സിസ്റ്റര്‍ ഡോക്ടര്‍ ലീസയും, മാനസിക സമ്മര്‍ദ്ദ നിയന്ത്രണ മാര്‍ഗ്ഗങ്ങളെക്കുറിച്ച് ഡോ. തോമസ് കോട്ടരും, ഭിന്നശേഷിയുള്ള കുട്ടികളുടെ പരിപാലനത്തില്‍ മാതാപിതാക്കള്‍ക്കു നല്‍കേണ്ട മാര്‍ഗ്ഗനിര്‍ദ്ദേശങ്ങള്‍ എന്ന വിഷയത്തില്‍ ഷൈല തോമസും  ക്ലാസ്സ് നയിച്ചു. ആരോഗ്യരംഗത്തെ സമകാലിക വിവരങ്ങള്‍ പങ്കുവയ്ക്കുന്നതിനും ഡോക്ടര്‍മാര്‍ തമ്മിലുള്ള നെറ്റ്‌വര്‍ക്കിംഗ്  ശക്തമാക്കുന്നതിനുമായാണ് സംഗമം സംഘടിപ്പിച്ചത്. വിവിധ കലാപരിപാടികളും സംഗമത്തോടനുബന്ധിച്ച് നടത്തപ്പെട്ടു. 

ന്യൂഡല്‍ഹി: ഇന്ന് രാജ്യമെമ്പാടുമുള്ള ഡോക്ടര്‍മാര്‍ പണിമുടക്കും. പശ്ചിമബംഗാളില്‍ സമരംചെയ്യുന്ന ഡോക്ടര്‍മാര്‍ക്കു പിന്തുണ പ്രഖ്യാപിച്ചാണ് പണിമുടക്കുന്നത്. 24 മണിക്കൂറാണ് പണിമുടക്കുന്നത്. രാവിലെ ആറുമുതല്‍ ചൊവ്വാഴ്ച രാവിലെ ആറു വരെയാണ് ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ.) ആഹ്വാനം ചെയ്ത പണിമുടക്ക്. അത്യാഹിതവിഭാഗം ഒഴികെയുള്ള സേവനങ്ങളൊന്നും ലഭിക്കില്ല.ഡോക്ടര്‍മാര്‍ക്കും മറ്റു ജീവനക്കാര്‍ക്കും ആശുപത്രികള്‍ക്കും നേരെയുണ്ടാകുന്ന അക്രമം നേരിടാന്‍ സമഗ്രമായ കേന്ദ്രനിയമം വേണമെന്നാണ് ഐ.എം.എ.യുടെ ആവശ്യം. സമരത്തില്‍ കേരളത്തിലെ ഡോക്ടര്‍മാരും പങ്കാളികളാവും. കെ.ജി.എം.ഒ.എ.യുടെ നേതൃത്വത്തില്‍ സര്‍ക്കാര്‍ ഡോക്ടര്‍മാര്‍ രാവിലെ പത്തുവരെ ഒ.പി. ബഹിഷ്‌കരിക്കും. കെ.ജി.എസ്.ഡി.എ.യുടെ നേതൃത്വത്തില്‍ സ്പെഷ്യാലിറ്റി ഡോക്ടര്‍മാര്‍ ഒ.പി.യില്‍നിന്നു വിട്ടുനില്‍ക്കും. സമരത്തിന്റെ ഭാഗമായി രാവിലെ 10 മുതല്‍ 11 വരെ ഡോക്ടര്‍മാര്‍ രാജ്ഭവനുമുന്നില്‍ ധര്‍ണ നടത്തും.മെഡിക്കല്‍വിദ്യാര്‍ഥികളും ജൂനിയര്‍ഡോക്ടര്‍മാരും സമരത്തില്‍ പങ്കെടുക്കും. കറുത്ത ബാഡ്ജ് ധരിച്ചാകും ജോലിക്കെത്തുക. സ്വകാര്യ പ്രാക്ടീസ് പൂര്‍ണമായും ഒഴിവാക്കും. ഡെന്റല്‍ ക്ലിനിക്കുകള്‍ അടച്ചിടും. സ്വകാര്യാശുപത്രികളും പ്രവര്‍ത്തിക്കില്ല.

കൊല്ലം: കെഎസ്‌ആര്‍ടിസിയും കോണ്‍ക്രീറ്റ്‌ മിക്‌സര്‍ വണ്ടിയും കൂട്ടിയിടിച്ചുണ്ടായ അപകടത്തില്‍ നാലുപേരുടെ നില ഗുരുതരം. കെഎസ്ആര്‍ടിസി ബസിന്‍റെ ഡ്രൈവര്‍ പ്രകാശന്‍, കണ്ടക്ടര്‍ സജീവന്‍, എന്നിവര്‍ക്കൊപ്പം മറ്റ് രണ്ട് പേരെയും തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് ഇരു വാഹനങ്ങള്‍ക്കും തീപിടിച്ചു. രണ്ട് വാഹനങ്ങളും പൂര്‍ണമായും കത്തിനശിച്ചു. അപകടത്തില്‍ 11 പേർക്ക് പരിക്കേറ്റിട്ടുണ്ട്. മൂന്നരയോടെയാണ്  അപകടം സംഭവിച്ചതെന്നാണ്‌ വിവരം.അതേസമയം അപകടം നടന്ന സ്ഥലത്തെത്താന്‍ ഫയര്‍ഫോഴ്‌സ്‌ വൈകിയെന്ന പരാതിയുമായി നാട്ടുകാര്‍ രംഗത്തെത്തി. പരിക്കേറ്റവരെ പൊലീസിന്റെ നേതൃത്വത്തിലാണ്‌ ആശുപത്രിയില്‍ എത്തിച്ചത്.

ഫെയ്സ്ബുക്കിലൂടെ മാപ്പുചോദിച്ച് എറണാകുളം സെൻട്രൽ സിഐ നവാസ്. എല്ലാവരേയും വിഷമിപ്പിച്ചതിന് മാപ്പു ചോദിക്കുന്നു.യാത്രപോയത് ശാന്തിതേടിയെന്നും നവാസ് ഫെയ്സ്ബുക്കില്‍ കുറിച്ചു. മനസ്സ് നഷ്ടപ്പെടുമെന്നായപ്പോഴാണ് യാത്ര പോയതെന്നും അദ്ദേഹം കുറിക്കുന്നു. അതേസമയം, കാണാതായശേഷം ഇന്നു പുലർച്ചെ തമിഴ്നാട്ടിൽ നിന്ന് കണ്ടെത്തിയ സർക്കിൾ ഇൻസ്പെക്ടർ വി.എസ്. നവാസിനെ ഉച്ചക്കുശേഷം കൊച്ചിയിൽ എത്തിക്കും. കൊച്ചിയിൽ നിന്നുള്ള അന്വേഷണസംഘം പാലക്കാട്ടെത്തി നവാസിനെ ഏറ്റുവാങ്ങി. റെയിൽവേ പൊലീസാണ് സിഐയെ തിരിച്ചറിഞ്ഞത്. 

കാണാതായി ഏതാണ്ട് 48 മണിക്കൂർ എത്തുമ്പോഴാണ് ആശ്വാസത്തിന്റെ ആ വാർത്ത എത്തുന്നത്. നാഗർകോവിൽ കോയമ്പത്തൂർ ട്രെയിനിൽ യാത്ര ചെയ്യുമ്പോൾ പുലർച്ചെ മൂന്നോടെ കരൂരിൽ വച്ചാണ് നവാസിനെ കണ്ടെത്തുന്നത്. തമിഴ്നാട് റയിൽവേ പൊലീസിലെ മലയാളി ഉദ്യോഗസ്ഥൻ സംശയം തോന്നി കേരളത്തിലേക്ക് വിവരം അറിയിച്ചു. തുടർന്ന് ഇവിടെ നിന്ന് ഫോട്ടോകൾ അയച്ചുകൊടുത്ത് നവാസ് തന്നെയെന്ന് ഉറപ്പാക്കി, അഞ്ചു മണിയോടെ കരൂർ സ്റ്റേഷനിൽ എത്തിച്ചു. പാലക്കാട്ട് നിന്നുള്ള പോലീസ് സംഘം രാവിലെ തന്നെ അവിടെയെത്തി അദ്ദേഹത്തെ ഏറ്റുവാങ്ങി കൊച്ചിയിൽ നിന്നുള്ള പ്രത്യേക അന്വേഷണസംഘത്തിന് പാലക്കാട്ടെത്തിച്ച് കൈമാറി.

വ്യാഴം പുലർച്ചെ പുറപ്പെടും മുൻപ് ഭാര്യക്ക് മെസേജ് അയച്ചതു പോലെ ഒരു ദീർഘയാത്ര ആയിരുന്നു പദ്ധതിയെന്നും തന്നെച്ചൊല്ലി നാട്ടിലുണ്ടായ കോലാഹലമൊന്നും അറിഞ്ഞില്ല എന്നുമാണ് പ്രാഥമികമായി അദ്ദേഹം ഉദ്യോഗസ്ഥരോട് പറഞ്ഞത്.ഏതാനും മണിക്കൂറുകൾക്കുള്ളിൽ കൊച്ചിയിൽ എത്തിക്കുന്ന സിഐയെ കോടതിയിൽ ഹാജരാക്കും. കാണാതായ ആൾ തിരിച്ചെത്തിയെന്ന് അറിയിച്ച് കോടതിക്ക് റിപ്പോർട്ടും നൽകുന്നതോടെ സൗത്ത് പോലീസ്‌ റജിസ്റ്റർ ചെയ്ത ക്രിമിനൽ കേസിലെ നടപടികൾ പൂർത്തിയാകും. എന്നാൽ സിഐയെ കാണാതായ ശേഷം ഭാര്യ നല്‍കിയ പരാതിയിലെ ആരോപണങ്ങളെ സംബന്ധിച്ച് വകുപ്പുതല അന്വേഷണം ഇനി നടക്കും. രണ്ട് കാര്യങ്ങളാണ് അന്വേഷണ പരിധിയിൽ വരേണ്ടത്. ഒന്ന്, വ്യാഴം പുലർച്ചെ സിഐയെ കാണാതാകുന്നതിന് തൊട്ടുമുൻപ് അദ്ദേഹത്തെ വയർലെസിൽ ശകാരിച്ച അസിസ്റ്റന്റ് കമ്മിഷണറുടെ നടപടി. രണ്ട്, കള്ളക്കേസ് എടുക്കാനും മറ്റും സമർദ്ദം ചെലുത്തി മറ്റ് ചില മേലുദ്യോഗസ്ഥരും പീഡിപ്പിച്ചുവെന്ന ഭാര്യയുടെ ആരോപണം. തിരിച്ചെത്തുന്ന നവാസും ഈ പരാതികളെ പിന്തുണക്കുമോ എന്നതിനെ ആശ്രയിച്ചിരിക്കും ഈ വകുപ്പുതല അന്വേഷണത്തിന്റെ ഭാവി.

കൊച്ചി : വ്യാഴാഴ്ച രാവിലെ മുതല്‍ കാണാതായ എറണാകുളം സെന്‍ട്രല്‍ സ്‌റ്റേഷനിലെ സര്‍ക്കിള്‍ ഇന്‍സ്‌പെക്ടര്‍ വി എസ് നവാസിനായി കൊച്ചി പോലീസ് അന്വേഷണം ഊര്‍ജിതമോക്കി. സ്‌പെഷ്യല്‍ ബ്രാഞ്ച് അസി. കമ്മീഷര്‍ എസ് ടി സുരേഷ് കുമാര്‍, ത്രിക്കാക്കര എ.സി.പി സ്റ്റുവര്‍ട്ട് കീലര്‍ എന്നിവരുടെ നേതൃത്വത്തില്‍ ഷാഡോ പോലീസ് അംഗങ്ങള്‍ ഉള്‍പ്പെടെ നാല് സംഘങ്ങള്‍ തെക്കന്‍ ജില്ലകള്‍ കേന്ദ്രീകരിച്ചാണ് അന്വേഷണം നടത്തുന്നത്. ഡെപ്യൂട്ടി കമ്മീഷര്‍ ജി. പൂങ്കുഴലിക്കാണ് അന്വേഷണച്ചുമതല.

ഇതിനിടെ നവാസ് കൊച്ചിയിലെ എ.ടി.എം കൗണ്ടറില്‍ നിന്ന് പണമെടുക്കുന്നതിന്റെയും എറണാകുളത്തുനിന്ന് കായംകുളത്തക്കുള്ള KSRTC ബസില്‍ കയറുന്നതിന്റെയും ദൃശ്യങ്ങള്‍ പോലീസിന് ലഭിച്ചു. ബസില്‍നിന്നിറങ്ങി കോടതി ആവശ്യത്തിനെന്നുപറഞ്ഞ് ചേര്‍ത്തലയില്‍നിന്ന് സുഹൃത്തായ മറ്റൊരു പോലീസുകാരന്റെ കാറില്‍ കയറിയ നവാസ് കായംകുളത്ത് ഇറങ്ങിയതായി വിവരം ലഭിച്ചിട്ടുണ്ട്. എന്നാല്‍ കായംകുളം കോടതില്‍ എത്തിയിട്ടില്ല. ഭാര്യക്ക് സുഖമില്ലെന്നും ഒരു യാത്ര പോകുകയണെന്നും മാതാവിനെ ക്വാട്ടേഴ്‌സിലേക്ക് അയക്കണമെന്നും കാണാതാകുന്നതിനുമുമ്പ് നവാസ് ബന്ധുവിന് വാട്‌സ്ആപ്പ് സന്ദേശം അയച്ചിട്ടുണ്ട്. പത്തുദിവസത്തേക്ക് സ്ഥലത്തുണ്ടാകില്ലെന്ന് പോലീസ് ഡ്രൈവറോട് പറഞ്ഞതായും അറിയുന്നു. സിം കാര്‍ഡും ഔദ്യോഗികവാഹനവും സ്‌റ്റേഷനില്‍ ഏല്‍പിക്കുകയും ചെയ്തു. സ്വന്തം മൊബൈല്‍ നമ്പര്‍ സ്വിച്ച്ഓഫ് ചെയ്ത നിലയിലാണ്. കായംകുളവും തിരുവനന്തപുരവും കേന്ദ്രീകരിച്ചുള്ള അന്വേഷണത്തിനുപുറമെ സ്‌പെഷ്യല്‍ ബ്രാഞ്ചിനെക്കൂടി ഉള്‍പ്പെടുത്തി മറ്റ് ജില്ലകളിലും തിരച്ചില്‍ നടക്കുന്നുണ്ട്. വ്യാഴാഴ്ച പുലര്‍ച്ച നാലോടെ സൗത്തിലെ പോലീസ് ക്വാട്ടേഴ്‌സിലെത്തിയ നവാസിനെ അഞ്ചേമുക്കാലോടെയാണ് കാണാതായതെന്ന് ഭാര്യ നല്‍കിയ പരാതിയിലുള്ളത്. വാള്ളിയാഴ്ച മുഖ്യമന്ത്രിക്കും പരാതി നല്‍കി. ബുധനാഴ്ച രാത്രി അസി. കമ്മീഷറും നവാസും തമ്മില്‍ വയര്‍ലെസ് വെഴി വാക്കുതര്‍ക്കം ഉണ്ടായിരുന്നു. എ.സി.പിയുടെ ശകാരത്തില്‍ നവാസിന് ഏറെ മനോവിഷമം ഉണ്ടായതായി പരാതിയില്‍ പറയുന്നു. ഇവര്‍തമ്മിലുള്ള അഭിപ്രായഭിന്നതയുടെ കാരണങ്ങളും അന്വേഷിക്കുന്നുണ്ട്. മേലുദ്ദ്യോഗസ്ഥരുടെ സമ്മര്‍ദ്ദവും ഭീഷണിയും സൃഷ്ടിച്ച മാനസികപ്രയാസങ്ങളും അദ്ദേഹത്തെ നിരന്തരം അലട്ടിയിരുന്നതായി സഹപ്രവര്‍ത്തകരും പറയുന്നു.    

കോഴിക്കോട്: സംസ്ഥാനത്ത് ജൂണ്‍ 18 ന് നടത്താനിരുന്ന വാഹന പണിമുടക്ക് മാറ്റിവെച്ചു. ജിപിഎസ് ഘടിപ്പിക്കാനുള്ള തീരുമാനത്തില്‍ സാവകാശം ലഭിച്ചതിനെ തുടര്‍ന്നാണ് അടുത്ത ചൊവ്വാഴ്ച നടത്താനിരുന്ന പണിമുടക്ക് മാറ്റിയത്.മോട്ടോര്‍ വാഹനങ്ങളില്‍ ജിപിഎസ് ഘടിപ്പിക്കുന്നത് നിര്‍ബന്ധമാക്കിയതില്‍ പ്രതിഷേധിച്ചാണ് കേരള മോട്ടോര്‍ സംരക്ഷണ സമിതി മോട്ടോര്‍ വാഹന പണിമുടക്കിന് ആഹ്വാനം ചെയ്തത്. തുടര്‍ന്ന് ഇതുസംബന്ധിച്ച് ഗതാഗതമന്ത്രി ചര്‍ച്ച നടത്തുകയും, ജൂണ്‍ 26ന് വിഷയം ചര്‍ച്ച ചെയ്യാമെന്ന ഉറപ്പും നല്‍കിയതിനെ തുടര്‍ന്നാണ് തീരുമാനം. ജിപിഎസ് ഘടിപ്പിക്കാനുള്ള തീരുമാനത്തില്‍ സാവകാശം നല്‍കുമെന്ന് മന്ത്രി ഉറപ്പു നല്‍കിയെന്നും മോട്ടോര്‍ സംരക്ഷണ സമിതി വ്യക്തമാക്കി

 ജൂണ്‍ മൂന്നിന് കാണാതായ സൈനിക വിമാനത്തിലെ മൂന്നു മലയാളികളടക്കം 13 പേരും മരിച്ചതായി വ്യോമസേന.
വ്യോമസേനയുടെ എഎന്‍ 32 വിമാനത്തില്‍ ഉണ്ടായിരുന്ന എല്ലാവരും മരിച്ചതായാണ് ദീര്‍ഘമായ തിരച്ചിലിനുശേഷം വ്യോമസേന അറിയിച്ചത്. 
തൃശൂര്‍ സ്വദേശി വിനോദ്, കൊല്ലം അഞ്ചല്‍ സ്വദേശി അനൂപ് കുമാര്‍, കണ്ണൂര്‍ അഞ്ചരക്കണ്ടി സ്വദേശി എന്‍.കെ. ഷരിന്‍ എന്നിവരാണ് അപകടത്തില്‍ മരിച്ച മലയാളി സൈനികര്‍. വിമാനത്തിന്റെ അവശിഷ്ടങ്ങള്‍ കണ്ടെത്തിയ പ്രദേശത്ത് നടത്തിയ തിരച്ചിലില്‍ ആരെയും കണ്ടെത്താന്‍ കഴിഞ്ഞില്ലെന്നും ആരും ജീവനോടെയില്ലെന്നും വ്യോമസേന അറിയിച്ചു. 
മൃതദേഹങ്ങള്‍ കണ്ടെത്തുന്നതിനായി ശ്രമങ്ങള്‍ നടക്കുന്നുണ്ട്. കാണാതായി എട്ട് ദിവസത്തിന് ശേഷം കഴിഞ്ഞ ദിവസമാണ് അരുണാചല്‍ പ്രദേശിലെ ലിപ്പോ പ്രദേശത്ത് നിന്ന് വിമാനത്തിന്റെ അവശിഷ്ടങ്ങള്‍ കണ്ടത്തിയത്. ജൂണ്‍ മൂന്നിനാണ് വ്യോമസേനയുടെ എഎന്‍ 32 വിമാനം കാണാതായത്. 
പറന്നുയര്‍ന്ന് അരമണിക്കൂറിനുള്ളില്‍ വിമാനവുമായുള്ള ബന്ധം നഷ്ടപ്പെടുകയായിരുന്നു.അപകടം നടന്ന സ്ഥലം വന പ്രദേശമായതും അരുണാചല്‍പ്രദേശിലെ മോശം കാലാവസ്ഥയും തെരച്ചിലിനെ പ്രതികൂലമായി ബാധിച്ചിരുന്നു.

തിരുവനന്തപുരം: കൊച്ചി മെട്രോ തൃപ്പുണിത്തുറ വരെ നീട്ടുന്നതിന് 356 കോടി രൂപയുടെ പദ്ധതിക്ക് ഇന്നലെ ചേര്‍ന്ന മന്ത്രിസഭാ യോഗം അനുമതി നല്‍കി.  എറണാകുളം എസ്.എന്‍. ജംഗ്ഷന്‍ മുതല്‍ തൃപ്പുണിത്തുറ റെയില്‍വെ സ്റ്റേഷന്‍ / ബസ്സ് ഡിപ്പോ വരെ കൊച്ചി മെട്രോ പാത ഫേസ് 1 ബി ദീര്‍ഘിപ്പിക്കുന്നതിനാണ് മന്ത്രിസഭായോഗം അനുമതി നല്‍കിയത്. 

കേരള റെയില്‍ ഡെവലപ്മെന്‍റ് കോര്‍പറേഷനെ ചുമതലപ്പെടുത്തിയ 27 മേല്‍പ്പാലങ്ങളുടെ നിര്‍മ്മാണത്തിനായി കേന്ദ്രസര്‍ക്കാരുമായും റെയില്‍വേയുമായും ധാരണാപത്രം ഒപ്പിടാനും മന്ത്രിസഭായോഗം അനുമതി നല്‍കി. കിഫ്ബി ഫണ്ട് ഉപയോഗിച്ച് ചെയ്യുന്ന ചെര്‍പ്പുളശ്ശേരി പട്ടണത്തിലെ ഓവര്‍ബ്രിഡ്ജ് നിര്‍മ്മാണത്തിന് പകരമായി "ചെര്‍പ്പുളശ്ശേരി ബൈപാസ് നിര്‍മാണവും നഗരവികസനവും" എന്ന പ്രവൃത്തി റോഡ് ഫണ്ട് ബോര്‍ഡ് മുഖേന ചെയ്യാന്‍ അനുമതി നല്‍കി. 15.86 കോടി രൂപയാണ് ഇതിനു ചെലവ്

കോട്ടയം: കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ സ്‌കൂള്‍ കുട്ടികളെ പങ്കെടുപ്പിച്ചുകൊണ്ട് ജീവിത നൈപുണി അവബോധ സെമിനാര്‍ സംഘടിപ്പിച്ചു. ഓക്‌സ്ഫാമുമായി സഹകരിച്ച് പത്തനംതിട്ട ജില്ലയിലെ പെരിങ്ങറ ഗ്രാമപഞ്ചായത്തിലെ 1, 12, 13, 14, 15 വാര്‍ഡുകളിലെ കുട്ടികള്‍ക്കായി സംഘടിപ്പിച്ച അവബോധ സെമിനാറിന് ആലപ്പുഴ ജില്ലാ ജൂവനൈല്‍ ജസ്റ്റിസ് ബോര്‍ഡ് ഇന്റിറ്റിയൂഷണല്‍ കൗണ്‍സിലര്‍ അഞ്ജു ലക്ഷ്മി നേതൃത്വം നല്‍കി. സന്നദ്ധ പ്രവര്‍ത്തകരായ തോമസുകുട്ടി കെ. മാവേലില്‍, ലീന സിബിച്ചന്‍, പുഷ്പ്പാമ്മ എന്നിവര്‍ പരിപാടികള്‍ക്ക് നേതൃത്വം നല്‍കി. കൂടാതെ കുട്ടികള്‍ക്കായി പരിസ്ഥിതി സംരക്ഷണ സന്ദേശം പകര്‍ന്ന് നല്‍കുന്ന ചിത്ര രചനാ മത്സരവും വിവിധ മത്സരങ്ങളും സമ്മാനദാനവും ക്രമീകരിച്ചിരുന്നു

കോട്ടയം: ഭക്ഷ്യസുരക്ഷ പ്രവര്‍ത്തനങ്ങള്‍ക്ക് പ്രോത്സാഹനം നല്‍കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ ഹൈടെക് കോഴി വളര്‍ത്തല്‍ യൂണിറ്റുകള്‍ ലഭ്യമാക്കി. ബിവി 380 ഇനത്തില്‍പ്പെട്ട അറുപത് ദിവസം പ്രായമുള്ള 25 കോഴികളും അമ്പത് കിലോഗ്രാം കോഴിത്തീറ്റയും മരുന്നും ഹൈടെക് കൂടുമാണ് ലഭ്യമാക്കിയത്. കെ.എസ്.എസ്.എസ് പ്രവര്‍ത്തന ഗ്രാമങ്ങളിലെ സ്വാശ്രയ സംഘാംഗങ്ങള്‍ക്കായി നടപ്പിലാക്കുന്ന പദ്ധതിയുടെ ഭാഗമായി കൈപ്പുഴ, കിടങ്ങൂര്‍, ഇടയ്ക്കാട്ട്, മലങ്കര, ഉഴവൂര്‍, കടുത്തുരുത്തി, സിബിആര്‍ എന്നീ മേഖലകളിലാണ് കോഴിയും കൂടും അടങ്ങുന്ന 71 യൂണിറ്റുകള്‍ വിതരണം ചെയ്ത്. യൂണിറ്റുകളുടെ വിതരണോദ്ഘാടനം കെ.എസ്.എസ്.എസ് എക്‌സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍ നിര്‍വ്വഹിച്ചു. പ്രോഗ്രാം ഓഫീസര്‍ സിജോ തോമസ്, കോര്‍ഡിനേറ്റേഴ്‌സ്, ഗ്രാമതല സന്നദ്ധ പ്രവര്‍ത്തകര്‍ എന്നിവര്‍ പരിപാടികള്‍ക്ക് നേതൃത്വം നല്‍കി.

ഉഴവൂര്‍: ഒ.എല്‍.എല്‍.എച്ച്.എസ് സ്‌കൂളിന്റെയും ഉഴവൂരിന്റെയും ചരിത്രതാളുകളില്‍ തങ്കലിപികളാല്‍ എഴുതിചേര്‍ക്കപ്പെട്ട "ഓര്‍മ്മക്കൂട്ട്" എന്ന പുന;സംഗമം ഒരു വര്‍ഷം പിന്നിടുമ്പോള്‍ സൗഹൃദ ചരിത്രത്തിലെ അദ്ധ്യായങ്ങളില്‍ മറ്റൊരിടം തേടി കാരുണ്യ പദ്ധതികളുമായി വളര്‍ച്ചയുടെ പാതയിലേക്ക്.1992-ാം SSLC Batch യില്‍ പഠിച്ച ലോകത്തിന്റെ വിവിധ ഭാഗങ്ങളില്‍ ചിന്നിചിതറി കിടക്കുന്ന 190-ഓളം കൂട്ടുകാരെ ഒരു കുടക്കീഴില്‍ ഒന്നിച്ചുച്ചേര്‍ത്തുകൊണ്ട് ഈ സൗഹൃദ കൂട്ടായ്മ "ഓര്‍മ്മക്കൂട്ട് ചാരിറ്റബിള്‍ സൊസൈറ്റി" എന്ന പേരില്‍ രജിസ്റ്റര്‍ ചെയ്തു സൗഹൃദത്തിന് പുതിയ മാനങ്ങള്‍ നല്കികൊണ്ട് വിവിധ കര്‍മ്മ പദ്ധതികളുമായി മുന്നേറുകയാണ്. 

92-Batch യില്‍ നിന്നും ജീവിതയാത്രയുടെ കൗമാരത്തില്‍ തന്നെ നിത്യതയിലേക്ക് തിരിച്ചു വിളിക്കപ്പെട്ട രണ്ട് കൂട്ടുകാരാണ് പീറ്റര്‍ ഡോമിനിക്ക് ചൊളളമ്പേലും റോയി മാത്യുവും. റോയി മാത്യുവിന്റെ സ്മരണ നിലനിര്‍ത്തിക്കൊണ്ട് റോയിയുടെ മാതാവിന് കൈത്താങ്ങായി അജീവനാന്ത പെന്‍ഷന്‍ പദ്ധതി ഒരു വര്‍ഷമായി നല്കിവരുന്നു. പീറ്റര്‍ ഡോമിനിക്കിന്റെ ഓര്‍മ്മക്കായി പീറ്ററിന്റെ സഹോദരിമാര്‍ സൗജന്യമായി നല്കിയ ഭൂമിയില്‍ ഈ കൂട്ടായ്മ കൈകോര്‍ത്ത് നിര്‍മ്മിച്ച സ്വപ്‌നവീട് പീറ്ററിന്റെ വേര്‍പാടിന്റെ 25-ാം വാര്‍ഷിക ഓര്‍മ്മദിനമായ ജൂണ്‍ 15 ശനിയാഴ്ച ഭവനരഹിതയായ മറ്റൊരു സഹപാഠിക്ക് കൈമാറുമ്പോള്‍ കാരുണ്യത്തിന്റെ സ്പന്ദനം വിളിച്ചോതുന്ന അനര്‍ഘനിമിഷങ്ങള്‍ക്ക് സാക്ഷ്യം വഹിക്കുകയായിരിക്കും ഉഴവൂര്‍ നിവാസികള്‍.

ഈ സ്വപനവീടിന്റെ തക്കോല്‍ ദാനവും പുതിയതായി സ്ഥാപിതമായ ഓര്‍മ്മക്കൂട്ട് ചാരിറ്റബിള്‍ സൊസൈറ്റിയുടെ ഉദ്ഘാടനവും ജൂണ്‍ 15 ശനി 2pm ന് ഉഴവൂര്‍ പയസ്മൗണ്ട് OCS അങ്കണത്തില്‍വെച്ച് നവജീവന്‍ ട്രസ്റ്റ് ചയര്‍മാന്‍  പി.യു തോമസ്   ഉദ്ഘാടനം ചെയ്യപ്പെടുന്നതും സാമൂഹിക സാംസ്‌കാരിക മേഘലകളിലെ വിവിധ വ്യക്തികളള്‍ ആശംസകള്‍ അര്‍പ്പിക്കുന്നതുമാണ്.കാരുണ്യപ്രവര്‍ത്തനങ്ങളള്‍ക്ക് മുന്‍തൂക്കം കൊടുക്കുന്നതോടൊപ്പം കലാ സാംസ്‌കാരിക മേഘലകളിലും ആധുര വിദ്യാലയ മതേതരസ്ഥാപനങ്ങളുമായി ഏകോപിച്ചുകൊണ്ട് വ്യത്യസ്തമായ പ്രവര്‍ത്തനങ്ങളള്‍ കാഴ്ചവെച്ച് നാടിന്റെ നാട്ടുകാരുടെയും ഉന്നമനത്തിനായി പ്രവര്‍ത്തിക്കുന്ന വേറിട്ട ഒരു പ്രസ്ഥാനമായി ഓര്‍മ്മക്കൂട്ട് ചാരിറ്റബിള്‍ സൊസൈറ്റി നിലകൊള്ളുമെന്ന് സൊസൈറ്റിയുടെ പ്രഥമ പ്രസിഡന്റ് SAJEEV KURUVILA അഭിപ്രായപ്പെട്ടു. മറ്റു Executive Members : Secretory : SYRIAC MUNDATHANAM, Vice President : LOUJA STANLY, Joint Secretory : SHADEEP D, Tresurer : AMAL KUMAR. സൊസൈറ്റിയുടെ സുഗമമായ നടത്തിപ്പിന് 16 അംഗ ബോര്‍ഡ് കമ്മിറ്റിയും Fr. SOJAN KARAKUNNATH രക്ഷാധികാരിയും, JOJO AANAALY, MANIJ CC, SINTO V, JOHN, BIJU THOMAS, DIJO THOMAS, ANIL KT, STEPHEN KARIMTHOTTIYIL എന്നിവര്‍ അടങ്ങിയ 8 അംഗ ഉപദേശകസമിതിയും പ്രവര്‍ത്തിച്ചുവരുന്നു.

.

ന്യൂഡല്‍ഹി: കേന്ദ്ര പാര്‍ലമെന്ററി-വിദേശകാര്യ സഹമന്ത്രി വി മുരളീധരനെ രാജ്യസഭാ ഡെപ്യൂട്ടി ചീഫ് വിപ്പായി നിയമിച്ചു. ബുധനാഴ്ച ചേര്‍ന്ന ബിജെപി പാര്‍ലമെന്ററി യോഗമാണ് മുരളീധരനെ ഡെപ്യൂട്ടി ചീഫ് വിപ്പായി തെരഞ്ഞെടുത്തത്. കേന്ദ്രമന്ത്രി തവാര്‍ചന്ദ് ഗെല്ലോട്ട് രാജ്യസഭാകക്ഷി നേതാവായിരിക്കും. പീയൂഷ് ഗോയലാണ് രാജ്യസഭയിലെ ഉപകക്ഷിനേതാവ്.പ്രധാനമന്ത്രി നരേന്ദ്രമോഡിയാണ് പാര്‍ട്ടിയുടെ ലോക്സഭാ കക്ഷിനേതാവ്. രാജ്നാഥ് സിംഗായിരിക്കും ലോക്സഭാ ഉപകക്ഷി നേതാവ്. കേന്ദ്രമന്ത്രിയായ പ്രഹ്ളാദ് ജോഷി സര്‍ക്കാര്‍ ചീഫ് വിപ്പായി പ്രവര്‍ത്തിക്കും. അര്‍ജുന്‍ രാം മേഘ്വാള്‍ ലോക്സഭയിലെ ഡെപ്യൂട്ടി ചീഫ് വിപ്പാവും. ലോക്സഭയിലെ ബിജെപി ചീഫ് വിപ്പായി സഞ്ജയ് ജയ്സ്വാളിനെയും നിയമിച്ചു.

ഗ്വാളിയോര്‍: മധ്യപ്രദേശില്‍ വാഹനാപകടത്തില്‍ മരിച്ച ബിഷപ് തോമസ് തെന്നാട്ടിന്റെ മൃതദേഹം ആറു മാസത്തിനു ശേഷം കല്ലറയില്‍ നിന്ന് പുറത്തെടുത്ത് പരിശോധിച്ചു. മരണത്തില്‍ ദുരൂഹത ആരോപിച്ച് ഒരു വിശ്വാസി നല്‍കിയ പരാതിയില്‍ കോടതി ഉത്തരവ് പ്രകാരമാണ് മൃതദേഹം പോലീസ് പുറത്തെടുത്തത്. വിശദമായ പരിശോധനയ്ക്ക് വേണ്ടിയാണ് മൃതദേഹം പോലീസ് പുറത്തെടുത്തതെന്നും പരിശോധന പൂര്‍ത്തിയായ ശേഷം സര്‍ക്കാരിന്റെ അനുമതിയോടെ തിരികെ ഇതേ കല്ലറയില്‍ തന്നെ സംസ്‌കരിക്കുമെന്നും ഗ്വാളിയോര്‍ രൂപത പി.ആര്‍.ഒ ഫാ.മരിയ സ്റ്റീഫന്‍ ഒരു ക്രിസ്ത്യന്‍ ഓണ്‍ലൈന്‍ പ്രസിദ്ധീകരണത്തോട് പ്രതികരിച്ചു.

2018 ഡിസംബര്‍ 14ന് രാത്രിയുണ്ടായ കാറപകടത്തിലാണ് 65കാരനായ ബിഷപ് തോമസ് തെന്നാട്ട് മരണമടഞ്ഞത്. ഏറ്റുമാനൂര്‍ സെന്റ് ജോസഫ് ക്‌നാനായ കത്തോലിക്ക പളളി ഇടവകാംഗമായിരുന്നു മാര്‍ തോമസ് തെന്നാട്ട്. ക്‌നാനായ സമുദായ അംഗമായ തോമസ് തെന്നാട്ട് പിതാവിന്റെ അകാലത്തിലുണ്ടായ മരണം ക്‌നാനായ സമുദായങ്ങളില്‍ ഞെട്ടലുളവാക്കിയ സംഭവമാണ്. ഗ്വാളിയോര്‍ രുപതയുടെ ബിഷപ് ആയിരുന്നു ഈ സമയം മാര്‍ തോമസ്. കാര്‍ തലകീഴായി മറിഞ്ഞാണ് അപകടമെന്നും തലയ്‌ക്കേണ്ട ഗുരുതരമായ പരിക്കുകളാണ് ബിഷപിന്റെ മരണത്തിന് കാരണമെന്നും രൂപത പറഞ്ഞിരുന്നു. ഷിയോപുര്‍ ജില്ലയില്‍ രൂപതയുടെ ഒരു സ്‌കൂളില്‍ നടന്ന പരിപാടിയില്‍ പങ്കെടുത്ത ശേഷം ഗ്വാളിയോറിലേക്ക് മടങ്ങുകയായിരുന്നു ബിഷപ്. ഗ്വാളിയോറിന് 125 കിലോമീറ്റര്‍ തെക്ക്പടിഞ്ഞാറ് പൊഹരിയിലാണ് അപകടമുണ്ടായത്. പരിക്കേറ്റ ബിഷപിനെ ഗ്വാളിയോറിനെ സെന്റ് ജോസഫ് ആശുപത്രിയില്‍ പ്രവേശിപ്പിച്ചുവെങ്കിലും രാത്രി 10 മണിയോടെ മരണം സംഭവിച്ചിരുന്നു. അപകട സമയത്ത് ബിഷപിനൊപ്പം കാറില്‍ മറ്റ് മൂന്ന് വൈദികര്‍ കൂടിയുണ്ടായിരുന്നു. ഇവര്‍ക്കാര്‍ക്കും ഒരു പരിക്കും സംഭവിച്ചില്ല. കാറിനും യാതൊരു കേടുപാടുമില്ല. ബിഷപിന്റെ മൃതദേഹം പോസ്റ്റ്‌മോര്‍ട്ടം ചെയ്യുന്നതിനോ കൂടുതല്‍ അന്വേഷണം നടത്തുന്നതിനോ പോലീസും തയ്യാറായില്ല. ബിഷപിന്റെ മരണത്തില്‍ ഒപ്പമുണ്ടായിരുന്ന വൈദികര്‍ക്ക് പങ്കുള്ളതായി സംശയിക്കുന്നതായും അവര്‍ ഹര്‍ജിയില്‍ ചൂണ്ടിക്കാട്ടിയിരുന്നു. ഇത് പരിഗണിച്ചാണ് കോടതി അന്വേഷണത്തിന് ഉത്തരവിട്ടത്. എന്നാല്‍ മരണത്തില്‍ ദുരൂഹത ചൂണ്ടിക്കാട്ടി സഭാംഗമായ ഡോളി തെരേസ എന്ന അത്മായ സഭാതലങ്ങളില്‍ പരാതി നല്‍കിയിരുന്നുവെങ്കിലും അവയെല്ലാം നിരസിക്കപ്പെടുകയായിരുന്നു. ഇതോടെയാണ് അവര്‍ കോടതിയെ സമീപിച്ചത്. മേയ് 11ന് പൊഹരി ജുഡീഷ്യല്‍ മജിസ്‌ട്രേറ്റ് ഫസ്റ്റ് കഌസ് നിധി നീലേഷ് ശ്രീവാസ്തവയാണ് ബിഷപിന്റെ മൃതദേഹം പുറത്തെടുത്ത് പരിശോധന നടത്താന്‍ പോലീസിന് നിര്‍ദേശം നല്‍കിയത്. ഒരു മാസത്തിനകം റിപ്പോര്‍ട്ട് നല്‍കണമെന്നും കോടതി ഉത്തരവിട്ടിരുന്നു.

ന്യൂഡല്‍ഹി : അറബിക്കടലില്‍ രൂപപ്പെട്ട വായു ചുഴലികാറ്റ് ഗുജറാത്ത് തീരത്തേക്ക് നീങ്ങുന്നതായി കാലാവസ്ഥ നിരീക്ഷണ വകുപ്പ്. അടുത്ത 24 മണിക്കൂറിനുള്ളില്‍ തീവ്രചുഴലിക്കാറ്റായി മാറുന്ന വായു ഗുജറാത്തില്‍ ആഞ്ഞടിക്കും. കടല്‍ പ്രക്ഷുബ്ദമാകാനും ഉയര്‍ന്ന തിരമാലയ്ക്കും സാധ്യത. കേരളത്തിലും ശക്തമായ മഴയ്ക്ക് സാധ്യതയുണ്ട്.അതേസമയം, സംസ്ഥാനത്ത് ഇന്ന് ഒറ്റപ്പെട്ട ശക്തമായ മഴ ലഭിക്കുമെന്ന് കാലാവസ്ഥാ നിരീക്ഷണ കേന്ദ്രം. ഒന്‍പത് ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചു. 

അറബിക്കടലില്‍ ലക്ഷദ്വീപിനോട് ചേര്‍ന്ന് രൂപപ്പെട്ട ന്യൂനമര്‍ദം 12 മണിക്കൂറിനുള്ളില്‍ തീവ്രന്യൂനമര്‍ദ്ദമാകും. തുടര്‍ന്ന് ചുഴലിക്കാറ്റാകാന്‍ സാധ്യതയെന്നും മുന്നറിയിപ്പ്. മത്സ്യതൊഴിലാളികള്‍ കടലില്‍ പോകരുതെന്ന് കര്‍ശന നിര്‍ദ്ദേശം. കാലവര്‍ഷക്കെടുതി നേരിടുന്നതിനായി താലൂക്ക് തലത്തില്‍ കണ്‍ട്രോള്‍ റൂമുകള്‍ തുറന്നു.സംസ്ഥാനത്ത് ഇന്നും ഒറ്റപ്പെട്ട ശക്തമായ മഴ ലഭിക്കുമെന്നാണ് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂര്‍, മലപ്പുറം, കോഴിക്കോട്, കണ്ണൂര്‍, കാസര്‍ഗോഡ് എന്നീ ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചിട്ടുണ്ട്.

ഝാന്‍സി: അസഹനീയമായ ചൂടിനെ തുടര്‍ന്ന് ട്രെയിന്‍ യാത്രക്കാരായ നാലുപേര്‍ മരിച്ചു. ഒരാളെ അതീവഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു.കേരള എക്‌സ്പ്രസിലെ യാത്രക്കാരായ നാലുപേരാണ് കനത്ത ചൂടിനെത്തുടര്‍ന്ന് ഉത്തര്‍പ്രദേശിലെ ഝാന്‍സിയില്‍ മരിച്ചത്. കോയമ്പത്തൂര്‍ സ്വദേശികളാണ് മരിച്ചത്. ആഗ്രയില്‍ നിന്ന് കോയമ്പത്തൂരിലേക്ക് സ്ലീപ്പര്‍ കോച്ചില്‍ യാത്രചെയ്തവരാണ് അപകടത്തില്‍പ്പെട്ടത്. ചൊവ്വാഴ്ച ഝാന്‍സിയില്‍ 48.1 ഡിഗ്രി ചൂടാണു രേഖപ്പെടുത്തിയത്. 

മൃതദേഹങ്ങള്‍ പോസ്റ്റ്‌മോര്‍ട്ടത്തിനായി ആശുപത്രിയിലേക്ക് മാറ്റി. പോസ്റ്റുമോര്‍ട്ടത്തിന് ശേഷം മൃതദേഹങ്ങള്‍ കോയമ്പത്തൂരിലുള്ള ബന്ധുക്കള്‍ക്ക് വിട്ടുനല്‍കുമെന്ന് റയില്‍വേ അധികൃതര്‍ അറിയിച്ചു. വാരണാസിയും ആഗ്രയും സന്ദര്‍ശിച്ച് മടങ്ങിയ 68 അംഗ സംഘത്തില്‍ ഉള്‍പ്പെട്ടവരാണ് മരിച്ചത്.

കൊടും ചൂടിനെ തുടര്‍ന്ന് ഏഴാം തീയതി ഗാസിപുര്‍ സ്വദേശി രാജേഷ് ഗുപ്തയെ ഖുശിനഗര്‍ എക്സ്പ്രസില്‍ മരിച്ച നിലയില്‍ കണ്ടെത്തിയിരുന്നു. ജൂണ്‍ 1-ന് സീതയെന്ന പെണ്‍കുട്ടിയെ യുപി ജന്‍സമ്പര്‍ക്ക്ക്രാന്തി എക്സ്പ്രസില്‍ മരിച്ചനിലയില്‍ കണ്ടിരുന്നു.

കോട്ടയം : കേരള കത്തോലിക്കാ മെത്രാന്‍ സമിതിയുടെ നേതൃത്വത്തില്‍ പ്രവര്‍ത്തിക്കുന്ന കെ.സി.ബി.സി ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷന്റെ ആഭിമുഖ്യത്തിലുള്ള കേരള സോഷ്യല്‍ സര്‍വ്വീസ് ഫോറം കേരളത്തിലെ രൂപതാ സോഷ്യല്‍ സര്‍വ്വീസ് സൊസൈറ്റികള്‍ക്കായി ഏര്‍പ്പെടുത്തിയ മികച്ച പ്രളയാനന്തര പുനരധിവാസ പ്രവര്‍ത്തനങ്ങള്‍ ഉള്‍ച്ചേര്‍ത്ത ഡോക്യുമെന്ററിക്കുള്ള പുരസ്‌ക്കാരം ഇരിഞ്ഞാലക്കുട രൂപതയിലെ സോഷ്യല്‍ ആക്ഷന്‍ ഫോറത്തിന് സമ്മാനിച്ചു. കേരളത്തിലെ മുപ്പത്തിരണ്ട് കത്തോലിക്കാ രൂപതകളിലെ സാമൂഹ്യ സേവന വിഭാഗങ്ങളില്‍ നിന്നും ലഭ്യമായ ഡോക്യുമെന്ററികള്‍ വിലയിരുത്തിയാണ് ഇരിഞ്ഞാലക്കുട സോഷ്യല്‍ ആക്ഷന്‍ ഫോറത്തിനെ പുരസ്‌ക്കാരത്തിന് തെരഞ്ഞെടുത്തത്. അടിച്ചിറ ആമോസ് സെന്ററില്‍ നടത്തപ്പെട്ട ചടങ്ങില്‍ എസ്.എ.എഫ്.ഐ ഡയറക്ടര്‍ ഫാ. വര്‍ഗീസ് കോന്തുരുത്തി  കെ.സി.ബി.സി. ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷന്‍ വൈസ് ചെയര്‍മാന്‍ മാര്‍ ജോസ് പൊരുന്നേടം പിതാവില്‍ നിന്നും പുരസ്‌ക്കാരം ഏറ്റുവാങ്ങി.  കെ.സി.ബി.സി ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷന്‍  ചെയര്‍മാന്‍ ആര്‍ച്ചുബിഷപ്പ് തോമസ് മാര്‍ കൂറിലോസ്, ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷന്‍ ജോയിന്റ് സെക്രട്ടറിമാരായ മോണ്‍. മൈക്കിള്‍ വെട്ടിക്കാട്ട്, ഫാ. തോമസ് തറയില്‍, ഫാ. ജോളി ലൂക്കോസ്, ഫാ. ആല്‍ബര്‍ട്ട് തമ്പിദുരൈ തുടങ്ങിയവര്‍ സന്നിഹിതരായിരുന്നു.  കേരള സോഷ്യല്‍ സര്‍വ്വീസ് ഫോറം എക്‌സിക്യൂട്ടീവ് ഡയറക്ടര്‍ ഫാ. ജോര്‍ജ്ജ് വെട്ടിക്കാട്ടില്‍, പ്രോഗ്രാം ഓഫീസര്‍മാരായ സിസ്റ്റര്‍ ജെസ്സീന എസ്.ആര്‍.എ, ജോബി മാത്യു, ബെന്‍ മാത്യു എന്നിവര്‍ പരിപാടികള്‍ക്ക് നേതൃത്വം നല്‍കി.  

കോട്ടയം: കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ നടപ്പിലാക്കി വരുന്ന സമൂഹാധിഷ്ഠിത പുനരധിവാസ പദ്ധതിയുടെ ഭാഗമായി കുമരകം അഗാപ്പെ ഡെകെയര്‍ സെന്ററിലെ ഭിന്നശേഷിയുള്ള കുട്ടികളുടെ പ്രവേശനോത്സവം സംഘടിപ്പിച്ചു. കുമരകം അഗാപ്പെ സെന്ററില്‍ സംഘടിപ്പിച്ച പ്രവേശനോത്സവത്തിന്റെ ഉദ്ഘാടനം കുമരകം ഗ്രാമവികസന സമിതി പ്രസിഡന്റ് റവ. ഫാ. സ്റ്റീഫന്‍ കണ്ടാരപ്പള്ളി നിര്‍വ്വഹിച്ചു. കുമരകം ഗ്രാമപഞ്ചായത്ത് 4-ാം വാര്‍ഡ് മെമ്പര്‍ ഉഷ സലി, അഗാപ്പെ ഡെ കെയര്‍ സെന്റര്‍ പി.റ്റി.എ പ്രസിഡന്റ് എം.സി മത്തായി, കെ.എസ്.എസ്.എസ് സന്നദ്ധ പ്രവര്‍ത്തകരായ സിസ്റ്റര്‍ സിമി ഡി.സി.പി.ബി, ഷേര്‍ളി ജോസ്, ജീന അജി എന്നിവര്‍ പ്രസംഗിച്ചു. പ്രവേശനോത്സവത്തോടനുബന്ധിച്ച് കുമരകം പഞ്ചായത്തില്‍ നിന്നും കുട്ടികള്‍ക്കായി പഠനോപകരണങ്ങളും വൃഷതൈകളും ലഭ്യമാക്കി. കൂടാതെ കുമരകം കെ.സി.വൈ.എല്‍ യൂണിറ്റ് അംഗങ്ങളുടെ നേതൃത്വത്തില്‍ കുട്ടികള്‍ക്കായി സമ്മാനങ്ങളും വിതരണം ചെയ്തു. ഭിന്നശേഷിയുള്ള കുട്ടികളും അവരുടെ മാതാപിതാക്കളും പ്രവേശനോത്സവത്തില്‍ പങ്കെടുത്തു. 

കോട്ടയം : കേരള കത്തോലിക്കാ മെത്രാൻ സമിതിയുടെ നേതൃത്വത്തിൽ പ്രവർത്തിക്കുന്ന കെ.സി.ബി.സി ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷന്റെ ആഭിമുഖ്യത്തിലുള്ള കേരള സോഷ്യൽ സർവ്വീസ് ഫോറം കേരളത്തിലെ രൂപതാ സോഷ്യൽ സർവ്വീസ് സൊസൈറ്റികൾക്കായി ഏർപ്പെടുത്തിയ മികച്ച വാർഷിക പ്രവർത്തന റിപ്പോർട്ടിനുള്ള പുരസ്‌ക്കാരം പീപ്പിൾസ് സർവ്വീസ് സൊസൈറ്റി പാലക്കാടിന് (പി.എസ്.എസ്.പി) സമ്മാനിച്ചു. കേരളത്തിലെ മുപ്പത്തിരണ്ട് കത്തോലിക്കാ രൂപതകളിലെ സാമൂഹ്യ സേവന വിഭാഗങ്ങളുടെ വാർഷിക പ്രവർത്തന റിപ്പോർട്ടുകൾ വിലയിരുത്തിയാണ് പാലക്കാട് പീപ്പിൾസ് സർവ്വീസ് സൊസൈറ്റിയെ പുരസ്‌ക്കാരത്തിന് തെരഞ്ഞെടുത്തത്. അടിച്ചിറ ആമോസ് സെന്ററിൽ നടത്തപ്പെട്ട ചടങ്ങിൽ പി.എസ്.എസ്.പി ഡയറക്ടർ ഫാ. ജേക്കബ്ബ് മാവുങ്കൽ  കെ.സി.ബി.സി. ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷൻ ചെയർമാൻ ആർച്ചുബിഷപ്പ് തോമസ് മാർ കൂറിലോസ് പിതാവിൽ നിന്നും പുരസ്‌ക്കാരം ഏറ്റുവാങ്ങി.  കെ.സി.ബി.സി ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷൻ വൈസ് ചെയർമാൻ മാർ ജോസ് പൊരുന്നേടം, ജസ്റ്റീസ് പീസ് ആന്റ് ഡെവലപ്പ്‌മെന്റ് കമ്മീഷൻ ജോയിന്റ് സെക്രട്ടറിമാരായ മോൺ. മൈക്കിൾ വെട്ടിക്കാട്ട്, ഫാ. തോമസ് തറയിൽ, ഫാ. ജോളി ലൂക്കോസ്, ഫാ. ആൽബർട്ട് തമ്പിദുരൈ തുടങ്ങിയവർ സന്നിഹിതരായിരുന്നു.  കേരള സോഷ്യൽ സർവ്വീസ് ഫോറം എക്‌സിക്യൂട്ടീവ് ഡയറക്ടർ ഫാ. ജോർജ്ജ് വെട്ടിക്കാട്ടിൽ, പ്രോഗ്രാം ഓഫീസർമാരായ സിസ്റ്റർ ജെസ്സീന എസ്.ആർ.എ, ജോബി മാത്യു, ബെൻ മാത്യു എന്നിവർ പരിപാടികൾക്ക് നേതൃത്വം നൽകി.  

കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല്‍ സര്‍വ്വീസ് സൊസൈറ്റിയുടെ നേതൃത്വത്തില്‍ സ്‌കൂളുകളില്‍ പരിസ്ഥിതി ദിനാചരണം സംഘടിപ്പിച്ചു. ഒക്‌സ്ഫാമുമായി സഹകരിച്ച്  പത്തനംതിട്ട ജില്ലയിലെ പെരിങ്ങറ ഗ്രാമപഞ്ചായത്തിലെ പ്രിന്‍സ് മാര്‍ത്താണ്ടവര്‍മ്മ സ്‌കൂളിലും ആലപ്പുഴ ജില്ലിയിലെ കിടങ്ങറ ഗ്രാമപഞ്ചായത്തിലെ കിടങ്ങറ ഗവ. ഹൈസ്‌കൂളിലുമാണ് പരിസ്ഥിതി ദിനാചരണം സംഘടിപ്പിച്ചത്. ദിനാചരണത്തിന്റെ ഭാഗമായി വായു മലിനീകരണത്തെക്കുറിച്ച് കുട്ടികള്‍ക്കായി ബോധവല്‍ക്കരണ പരിപാടി സംഘടിപ്പിച്ചു കൂടാതെ പരിസ്ഥിതി വിഷയങ്ങള്‍ ഉള്‍ച്ചേര്‍ത്തുകൊണ്ടുള്ള പ്രശ്‌നോത്തരിയും വൃക്ഷതൈകളുടെ നടീലും നടത്തപ്പെട്ടു. പ്രശ്‌നോത്തരി മത്സരത്തില്‍ വിജയികളായി തിരഞ്ഞെടുക്കപ്പെട്ടവര്‍ക്ക് സമ്മാനങ്ങളും വിതരണം ചെയ്തു. ഓക്‌സ്ഫാം പ്രതിനിധികളായ ഷൈനി ലാലു, നേഹ വര്‍മ്മ റാണി, കെ.എസ്.എസ്.എസ് സന്നദ്ധ പ്രവര്‍ത്തകര്‍ എന്നിവര്‍ പരിപാടികള്‍ക്ക് നേതൃത്വം നല്‍കി.

ഉഴവൂര്‍ സെന്റ് സ്റ്റീഫന്‍സ് കോളേജ് കൊമേഴ്‌സ് വിഭാഗം മേധാവി ശ്രീ. സ്റ്റീഫന്‍ മാത്യു പാറയിലിന് കേരളസര്‍വ്വകലാശാലയില്‍ നിന്നും ഡോക്ടറേറ്റ് ലഭിച്ചു. "കേരളത്തിലെ റബ്ബര്‍ ഉത്പാദക സംഘങ്ങള്‍ - അവയുടെ പ്രവര്‍ത്തനങ്ങള്‍, പ്രശ്‌നങ്ങള്‍ വെല്ലുവിളികള്‍" എന്ന വിഷയത്തില്‍ പെരിങ്ങമ്മല ഇക്ബാല്‍ കോളേജ് പ്രിന്‍സിപ്പല്‍ ഡോ. യു. അബ്ദുള്‍ കലാമിന്റെ കീഴിലാണ് ഗവേഷണം പൂര്‍ത്തിയാക്കിയത്. വെളിയൂര്‍ താമരക്കാട് പാറയില്‍ മത്തായി-അന്നമ്മയുടെ മകനാണ്. ഭാര്യ കടുത്തുരുത്തി എടക്കരപുത്തന്‍പുരയില്‍ ജെസീന്ത. ഏകമകന്‍ ഡെനില്‍ മാത്യു സ്റ്റീഫന്‍.